Вилояти Навоӣ ба туфайли захираҳои бойи маъданӣ, инфрасохтори пешрафта ва иқтидори баланди кадрӣ саноати кимиёвии пешрафта дорад. Дар вилоят барои бунёди корхонаҳои ояндадор фазои мусоиди сармоягузорӣ ва барои соҳибкорон шароит фароҳам оварда шудааст.
Дар ин замина аз ҷониби соҳибкорони чинӣ парки технологии кимиёвӣ бо номи «Zarafshon industrial technology» таъсис дода мешавад, ки барои он 130 гектар замин ҷудо шудааст. Дар назар аст, ки 18 лоиҳа ба маблағи беш аз 1 миллиард доллар амалӣ шавад.
Дар айни ҳол ду лоиҳаи истеҳсоли 40 ҳазор тонна олеум ва 170 ҳазор тонна кислотаи сулфат ба кор андохта шудааст. Ҷолиби диққат аст, ки бо мақсади самаранок истифода бурдан аз гармӣ, ки ҳангоми истеҳсоли кислотаи сулфат ҳосил мешавад, энергоблок бо таҷҳизоти буғугазии иқтидораш 1,4 мегаватт сохта шуд, ки ин ба корхона имконият медиҳад, худро бо қувваи барқ пурра таъмин намояд.
Ба Сарвари давлат дар бораи лоиҳаҳои наве, ки дар парки технологӣ амалӣ хоҳанд шуд, маълумот дода шуд. Аз ҷумла, сохтмони корхонаҳои тавлиди 1 миллион тонна кислотаи сулфат (150 миллион доллар), 50 ҳазор тонна содаи каустикӣ (120 миллион доллар) ва 100 ҳазор тонна фталотсианин (135 миллион доллар) оғоз шудааст.
Дар назар аст, ки дар парки технологӣ истеҳсолоти самарабахши кооператсионӣ таъсис дода шавад, ки имкон медиҳад, маҳсулот дар соҳаи сохтмон ба маблағи 75 миллион доллар, дар саноати сабук ба маблағи 107 миллион доллар ва дар соҳаи тиб ба маблағи 38 миллион доллар маҳаллӣ гардонда шавад. Айни замон сатҳи маҳаллисозӣ дар парки технологӣ 31 дарсадро ташкил медиҳад ва ба шарофати марҳила ба марҳила татбиқ намудани лоиҳаҳо ин нишондиҳанда ду баробар меафзояд.
Президент зарурати таъмини мувозинати истеҳсолот дар корхонаҳо, бастани шартномаҳои офтейк ва фурӯши кафолатноки маҳсулотро таъкид кард.
Дар парки технологӣ аллакай 300 нафар бо ҷойи кор таъмин гардида, пас аз татбиқи ҳамаи лоиҳаҳо беш аз 2 ҳазор ҷойи корӣ таъсис дода мешавад. Азхуд намудани истеҳсоли чунин маҳсулот, монанди антрахинон, содаи каустикӣ, хлориди мис, диметилсулфат, сулфиди натрӣ ва резортсин пешбинӣ карда шудааст. Иқтидори солонаи содиротии парки технологӣ то соли 2026 ба 30 миллион доллар расонида мешавад.
Сохтмони шабакаҳои коммуникатсионии зарурӣ аз ҳисоби сармоягузорони хориҷӣ анҷом дода мешавад.
Дар чаҳорчӯби сафар инчунин тақдимоти лоиҳаҳое, ки дар пойгоҳи ҷамъияти саҳҳомии “Навоиазот” дар солҳои 2024-2030 татбиқ мегарданд, баргузор гардид. Дар ин ҷо татбиқи 22 лоиҳа ба маблағи умумии 5 миллиард доллар бо бунёд намудани 3 ҳазор ҷойҳои нави корӣ ба нақша гирифта шудааст. Пешбинӣ шудааст, ки ҳар сол ба маблағи беш аз 2 миллиард доллар маҳсулоти кимиёвӣ тавлид шавад, ки қисми асосии он ба содирот бароварда хоҳад шуд.
Президент муҳим будани риояи талаботи экологӣ ва бо таҷҳизоти сатҳи партови гази карбонаташон кам муҷаҳҳазсозии корхонаҳоро таъкид намуд.
Сохтмони чор объект соли оянда анҷом дода мешавад. Сарвари давлат инчунин бо сармоягузорони ин лоиҳаҳо мулоқот анҷом дод.
